ګلِ رعنا تبسم
نوم ګلِ رعنا تخلص تبسم د پلار نوم شیرین خان بسمل چې د خپل د وخت پہ ښہ شاعرانو ادیبانو کښې شمار وۂ ۔ کلے سوات ګوګدرہ ، قام ابراہیم خیلہ پښتنہ ، خاوند نوم فضلِ معبود خان د سوات مټې تحصیل د راړنیګار کلی ۔ پہ پاک سټدی کښې اېم اے د مختلفو ملازمتونو سرہ وابسطہ پاتې شوې دہ ۔ پلار ئی تقریباٍ ۲۹کالہ وړاندې وفا تشوے دے ، د پلار پہ ژوندانۃ کښې یې شاعری کولہ ۔ خاوند ئې ھم وفات شوے دے ۔ د خپلو یتیمانو بچو کفالت او تعلیمونہ پہ خپل سر کړي دی ۔ د شاعرۍ استاد ئی عبدالرحیم روغانے دے ۔د شاعرۍ ئې دوہ مجموعې چاپ دي ۔ اولنۍ “ خال مې راتہ داغ شو “ او دوئمہ “مترنم اہونہ “ زما پہ نظر کښې د ګلِ رعنا بی بی شاعری پہ پښتنو ښځینہ شاعرانو کښې د فن او مقصدیت پہ لحاظ اعلیٰ او ارفع دہ ۔ نظم او غزل او سندرہ لیکی ۔ پہ شاعرۍ کښې حسن ، عشق ، ھجر ، وصال ، قام پرستی ، پښتو ژبہ ,حیا ، وفا ، کمزورې طبقې او د ښځو حقوقو لۂ پارہ اواز اوچتہ وی ۔ خو فن ھم پہ نظر کښې ساتی . چرتہ ئې ناصحانہ انداز نۂ دے خپل کړے او نۂ ئی د شاعرۍ نہ نعرہ او چغہ جوړہ شوې دہ ۔ د روایت او د جدت ښکلے امتزاج دے ۔
ګل تہ شوے د ازغو منځ کښې احساس دے
چې ګریوان کښې مې د ډېرو خلقو لاس دے
نېک نیتی دہ چې سبب د ترقۍ شی
بد نیتی دہ چې راوړے ئی افلاس دے
دا ایمان چې کوم خداے او پہ رسول دے
د ھر قسم اطمینان خوشۍ اساس دے
خپل غېرت راکړے مالہ شجاعت دے
زما زړۂ نہ ئې جوړ کړے یو الماس دے
پښتانۂ مې پېژندے شی پښتنہ یم
چې مې نۂ پېژنی ھغہ بد حواس دے
تبسم انسانیت تہ فلاح وائی
غېر ددې نہ چې څوک ځی ھغہ خناس دے
دومرہ چې نن پہ احترام ګوری
نوې سزا لہ مې الزام ګوری
شی سترګو سترګو تہ د یار سترګې ئې
څوک چې د خم پہ خوا کښې جام ګوری
عکاسی ځکہ ستا د مخ کوی نو
ګلاب تہ ځکہ خاص وعام ګوری
تورابان خپلہ حوصلہ اوبائیلی
چې ګل اندامې تہ پہ پام ګوری
چې ترې نہ ورک شو پہ کعبہ کښې اسلام
پہ واشنګټن کښې اوس اسلام ګوری
تبسم څوک د یقین پاتې نۂ دے
خداے شتہ کہ څوک حلال حرام ګوری