اسرار د طورو
د اسرار نوم اسرارالرحمٰن او تخلص اسرار دے ۔ د پلار نوم مولانا محمد عنایت ﷲ دے ۔ پہ نسب باندې سېد دے ۔ کلے او پتہ څۂ دا رنګې دہ محلہ صدیق خېل طورو مردان استوګنہ باغ کالونۍ کوڅہ نمبر (۱) شمس روډ ھوتي مردان ۔ تاریخ پېدائش ۱۵ ستمبر ۱۹۳۹ء ۔ تعلیم ایم اے اردو ، پشتو انرز ، بي اېډ چاپ کتابونہ (۱) امام اعظم (۲) زما کتاب د ماشومانو لہ پارہ نظمونہ (۳) د حرمېنو سفر (۴) د قرانِ پاک د اياتونو شمېر (۵) ادبي ھڅې یو ژوندے تصویر (۶) د کابل سفر (۷) لالہ زار د پرھرونو ۔ اسرار د طورو نظم او غزل دواړہ لیکي ۔ د اسرار پہ غزل کښې د رحمٰن بابا ، عبدالحمید بابا او خوشحال بابا درې واړو رنګونہ موندے شي یعني د اسرار پہ غزل کښې عشق ،تصوف ، باریک بېني ، او مزاحمت موجود دې ۔ ژبہ خواږۂ پستہ او روانہ دہ ۔ د غزل نہ ئې اندازہ لږي چې اسرار د خپل کلاسک ژورہ مطالعہ کړې دہ ۔ او دموجودہ وخت تقاضې ئې ھم پہ نظر کښې دي ۔ دا یوہ دوہ غزلونہ د نمونې پہ طور:
موسېږي د زخمونو یو جھان پہ ائینہ کښې
خندان شو راتہ جانہ ګلستان پہ ائینہ کښې
حېران ومہ چې ستا پہ تماشہ وم ځان مې ھېر وۂ
پہ ځان شومہ چې ومې لیدۂ ځان پہ ائینہ کښې
شباب کښې بې نیازہ نازولې د نازونو
اوس نیاز تہ ئې نیازونہ دي حېران پہ ائینہ کښې
ھوس کښې وۂ قاتل د بې ګناہ د وینو جام تہ
نن وګورہ مدھوش دے اویزان پہ ائینہ کښې
اسرارہ مبارک دې شہ جوھر د پاکې مینې
جمال درتہ ځلېږي د جانان پہ ائینہ کښې
د صبا اوښکې وې د ګل پہ پېمانہ کښې څۂ وو
د ھجر غم وۂ د بلبل پہ ترانہ کښې څۂ وو
مونږ ورلہ رنګ د وینو ورکړو نو څۂ خوند ئې وکړو
ګني ددې بې خوندہ ژوند پہ افسانہ کښې څۂ وو
ما د زړۂ جام کښې ستا د سترګو تماشہ کولہ
زما جانانہ د مغان پہ مېخانہ کښې څۂ وو
ستا د وطن د ملالۍ حیا ئې ټولہ کړلہ
پښتونہ یارہ د اغیارو یارانہ کښې څۂ وو
د زړۂ غبار پہ مخہ لاړو پښمان لالیہ
زۂ نۂ پوھېږم چې د اوښکو نزرانہ کښې څۂ وو
کۂ نوم دې اخلم پہ خُلې زړۂ مې دړدونہ کوي
تۂ څۂ خبر ئې د جفا پہ تازیانہ کښې څۂ وو
د موسېدونکي سباؤن د خوشحالۍ امید وۂ
اسرارہ نور پہ ھغہ تېرہ زمانہ کښې څۂ وو