زر نوش شھاب
د پلار نوم احمد ، تاریخ پېدائش ۳ جنوری ۱۹۴۸ء کلے تھانۃ ملاکنډتعلیم لسم جماعت ئې د تھانې ګورنمنټ ھائی سکول نہ پاس کړے دے ۔ د لسم نہ چې فارغ شو د پرائمری استاد بھرتی شو ۔ بیا ئې اېف اے ، بی اے پہ پرائیوېټ توګہ اوکړو ۔ پہ پښتو کښې انرز او سی ټی ئې ھم اوکړہ ۔ شاعری ئې طالب علمۍ پہ زمانہ کښی شروع کړہ ۔ پہ دغہ وخت کښې اولسی شاعری چاربېتہ ، لوبہ نیمکۍ او بدلہ پہ خپل عروج باندې وو ۔ شھاب ھم پہ دغہ اولسی اصنافو کښې شاعری شروع کړل خو ورستو غزل ، نظم او قطعې طرف تہ ئې رحجان شو ۔ پہ شاعرۍ کښې حسن ، عشق ، قام پرستی ، وطن پرستی، غریب پروری تقریباً ھرہ موضوع پہ نظر راځی ۔ زرنوش استاد دے پہ شاعرۍ کښې ئې ناصحانہ او اصلاحی رنګ ډېر سرګند دے ۔ د شھاب صېب تر دې دم پنځۂ شعری مجموعې چاپ دی ۔ ارمان د ګلو ، د ګل پہ سېوری ، مات ستوری ، دا خاموشی بہ د شپې زر ماتہ شی او د بنجاری سندرې ۔ پہ دې کتابونو کښې غزل ، نظم ، چاربېتہ ، نیمکۍ ، لوبہ او قطعہ پہ شریکہ موجود دی ۔پہ نثر کښې ډرامہ ، افسانہ او مضامین لیکی ۔ پہ سرکاری او مقامی سطع ئې ګڼ اېوارډونہ تر لاسہ کړې دی ۔
توبې اوباسم حقیقت کښې توبہ ګار نۂ شوم
د خپل ضمیر پہ عدالت کښې توبہ ګار نۂ شوم
وس کۂ د خېټې تنور ډک غواړمہ ګرم نۂ یمہ
چې د غنم نہ پہ جنت کښې توبہ ګار نۂ شوم
اول لوګے بیا ئې وریځ بیا ئې اوبۂ کړمہ زۂ
ستا د نظر پہ حرارت کښې توبہ ګار نۂ شوم
ډېر طوافونہ مې د حسن د کعبې نہ اوکړل
خو پہ دې دومرہ عدالت کښې توبہ ګار نۂ شوم
ھم د ناصح پہ خپل مطلب او پہ پخو خبرو
ھم د رقیب پہ شکایت کښې توبہ ګار نۂ شوم
عمل نامہ مې پہ لاس اووې چې تخلیق وۂ د رب
ستا د یارۍ پہ قیامت کښې توبہ ګار نۂ شوم
لۂ ډېرو چارو مې توبہ کړہ چې دستُور وۂ د وخت
د خپل اشنا سرہ پہ پت کښې توبہ ګار نۂ شوم
ټوټې ټوټې لکہ شھاب شومہ ور خور پہ فضا
چې د زلفانو پہ الفت کښې توبہ ګار نۂ شوم
زما پہ زړۂ پہ ذھن راج غواړی
جانان د خپل حسن خراج غواړی
چې پہ کښې مینہ او ھم امن وی قېد
بیا بہ بدلون دغہ سماج غواړی
مونږہ پہ داسې سلطنت کښې اوسو
پکښې ګنجے ھم پہ سر تاج غواړی
چې د صحت نہ کاروبار جوړ شی
بیا د طبیب ذھن علاج غواړې
بې ژبې جونہ پہ کالۂ شې زړې
خلق جینۍ نۂ غواړی داج غواړی
رقیبہ ستا د الزامانو جواب
بیا د منصور غوندې حلاج غواړی
حصول د مینې دومرہ ګران نۂ دے
خو خوشګوار غوندې مزاج غواړې
چې پلار راجہ زوے راجکمار وی پکښې
بیا بی خلاصے داسې راوج غواړی
زمونږہ قام د خپل حقوقو پہ ځاے
جنګ او فساد پہ احتجاج غواړی
د وسائلو پہ دې ډک وطن کښې
شھاب ډیوې لہ تېل پہ بیاج غواړی