طائر بونېرے
نوم طائر د پلار نوم چمن کلے پیر بابا علاقہ بونېر د قامہ قرېش دی ۔ د شانګلې نہ کډہ بونېر تہ راوړې دہ او اوس دلتہ ستوګن دی ۔ پرائمری تعلیم ئې پہ خپل کلی کښې حاصل کړے دے مېټرک ئې د کراچی بورډ نہ بقول طائر بونېری ايف اے او بی اے ډګریانې پہ پرائیو ېټ توګہ لاس تہ کړې دی ۔ د جرس ادبی جرګې کراچۍ غړے پاتې شوے دے ۔ پہ کوئټہ کښې یو اخبار اسمان سرہ ھم منسلک پاتې شوے دے او کالمونہ ئې پکښې لیکلی دی ۔ پہ کلی کښې څۂ مودہ فارسټ کښې ملازمت کړے دے ۔ د طائر یوہ شعری مجموعہ “زړۂ کښې د ساتلو څوک دې “دوځل چاپ دہ ۔ د نثر یو کتاب پښتانۂ خو پښتانۂ دی چې رپورتاژونہ دی د شمس بونېری پہ فکروفن باندې کتاب او یو ناچاپہ کتاب لاچی لونګ چې پہ خطونو باندې مشتمل دے ۔ طائر پہ اولہ کښې رومانی شاعری کولہ چې پکښې بہ د کلی وال ژوند ډېرہ ښکلې منظرکشی وہ ۔ دا د ھغۂ د زړۂ اواز وۂ غزل د داخل صنف دے خلق ترې متاثر کېدۂ ھم ۔ خو کلہ چې طائر پہ غزل کښې قام پرستۍ او معاشرتی نا ھمواری پہ زور داخل کړل د غزل رنګ ئې پیکہ شو ځکہ چې بیا بیا بیان شوی مضامین ھغۂ ھم بیان کړی دی چې څۂ خاص تاثر نۂ پرېږدی ۔
ښائستونہ دی ځوانی دہ او سپرلے دے
سم قیامت دے جدائی دہ او سپرلے دے
څانګہ بیا ټپې کوی واښۂ بہ رېبی
خوشے غر دے ناچاری دہ او سپرلے دے
ډېر زاړۂ زاړۂ زخمونہ مې تازہ شو
نوے کال دے خوشحالی دہ او سپرلے دے
د ایلم پہ سر ولاړ دے څوک او وائی
خدایہ څومرہ ساہ ډوبی دہ او سپرلے دے
یو ستا ھجر لېونے او سپېلنے کړم
نور قلارہ قلاری دہ او سپرلے دے
طائر بیا سپوږمۍ تہ ګوری خفہ ناست دے
نیمہ شپہ دہ تنھائی دہ او سپرلے دے
ملګرو ژوند ھم تېراول غواړی
د زھرو ګوټ دے ولې څښل غواړی
مینہ پہ زړونو کښې کرل غواړی
د ژوند قدرونہ بدلول غواړی
پہ مُلا سپورې فلسفې بندې کړئ
مُلا پہ مئیو لمبول غواړی
پښتون نن ھم ھغہ پښتون دے
یو د شېرشاہ غوندې اتل غواړی
خان بہ خالی حجرہ کښې څۂ اوکړی
خو خوار غریب بہ ترې شړل غواړی
طائرہ نن مجنون بدل ښکاری
ھم ابادی او ھم ځنګل غواړی