خیام یوسفزے
نوم امیر عاطر تخلص خیام دا تخلص ورلہ ډاکټر علی خېل دریاب خوښ کړے وۂ د پلار نوم برادر خان عاطر چې پخپلہ صاحبِ دیوان شاعر دے ۔ برادر عاطر پہ سعودی عرب کښې سټېلډ وۂ دې د پارہ د خیام یوسفزی دینی او دنیاوی تعلیم پہ سعودی عرب کښې شوے دے ۔ حافظ قران دے۔ خیام د رباب ھنر مند دے او پہ موسیقۍ باندې ښہ پوھہ دے راګ راګونہ ورتہ یاد دې چې اکثر ذکر خپل پہ شعر کښې ھم کوی ۔ د ائی ټی ډګری یې پہ لاس دہ ۔ پہ موجودہ وخت پہ سعودی عرب کښې د ائی ټی پہ شعبہ کښې ملازمت کوی او د ژوند غونډورے رغړوی ۔ د خیام یوسفزی څلور کتابونہ تر دې دمہ چاپ دی یوہ شعری مجموعہ جنون جام او جانان او درې جلدہ دنظم کتاب “ خوبونہ پہ ورغوی “ زما خیال دا پہ نثر کښې لیکل پکار وو پہ نظم کښې ھسې توانائ صرف کول وو۔ غزل نظم او قطعہ لیکی ۔ د غزل موضوعات یې رومانیت قام پرستی او خمریات ۔ خپل د کلاسېک مطالعہ یې کړې دہ ۔ غزل یې د روایت د جدت امتزاج دے ۔ ښہ غزل لیکی دا شعر یې د رحجان عکاسی کوی
ما کہ پرېښود څۂ کمے د شعر ھنر کښې
نقش د خیال مې شۂ لاھُو پہ سمندر کښې
د شعر اصلاح یې د ډاکټر علی خېل دریاب نہ اخستې دہ
دا اعزاز او نېک مرغی دہ ما د پارہ
چې دریاب زما شعر پہ کار پسند دے
ټول رنګونہ دې راغونډ کړل پہ نقاب کښی
خلل جوړ شۂ د سپرلی پہ اب وتاب کښې
زما ځانہ زما جانہ ما خبر کړہ
زما ژوند بہ ساتې څو پہ اضطراب کښې
یار تہ خط نۂ شم لیکلے لہ دې وېرې
چې خبر یم یار بہ څۂ لیکی جواب کښې
ستا د ھجر پہ صحرا کښې جل وھلے
مستغرق مې کړہ د وصل پہ دریاب کښې
پہ سبا مې ناشنا غوندې حالت وی
کومہ شپہ چې دې زۂ اووینم پہ خواب کښې
ستا د لاس نخښی د ځان سرہ ساتمہ
اوچې پاڼې راسرہ دی پہ کتاب کښی
زۂ خیام سکون پہ جام کښې ځکہ ګورم
سکون نیشتے محبت خانہ خراب کښې
کہ سندرې کہ نغمې دی
ستا د مینې اوازې دی
چې پہ زړۂ کښې دې اوسېږم
نو بیا څنګہ فاصلې دی
ژوند پخپلہ ملازہ شو ہ
ادب ځکہ ملازې دی
د پېسو دپارہ منډې
د وختونو تقاضې دی
د انسان منګولې ګورہ
د انسان پہ وینو سرې دی
لا خلاقہ لھم لولہ
پہ جھان کښې دې چرچې دی
ښکلی ګرځی مې پہ خیال کښې
کۂ خیامہ فرښتې دی