حاجی زرګل ګل
نوم زرګل د پلار نوم ادم خان پہ قام مومند خلیل موجودہ وخت پہ پېښور کښې اوسی د ھلکوالۍ عمر ئې پہ خېبر لواړګی کښې تېر کړے دے ۔ تاریخِ پېدائش ۱۹۶۳ءدے ۔تعلیم تر اتم جماعت پورې ، پېشہ ټېلر ماسټری دہ ۔ پہ ۱۹۸۰ ء کښې سعودی عرب تہ لاړ د ژوند څۂ وخت ھلتہ تېر کړے دے ۔ نن صبا تبلیغی جماعت سرہ وابسطہ دے ۔ یوہ شعری مجموعہ “ مونږ لېونی خو پہ دې نۃ یو چې تاوان دے پہ کښې “ پہ بنیادی توګہ د غزل شاعر دے ۔ پہ غزل کښې روزمرې ، محاورې ، متل او پښتون کلچر لہ پہ ھنر مندۍ سرہ ځائے ورکړے دے ۔ شاعری عام فہم ،سادہ او روانہ دہ ۔ موضوعات رومان، پښتون قام ، ژبہ او زپلے طبقې لہ پارہ ښہ ژوند ارزو دہ ۔ خو ھغہ چې څومرہ ښہ شعر لیکی د تعلیم د کمی پہ سبب فکر ئې دومرہ دروند نۂ دے۔ زرګل یو ښہ شاعر دے خو د لویو شاعرانو پہ صف کښې نۂ شو ودرولے ۔
پہ زمکہ کرښې وھم کرښو نہ بنګړی جوړوم
نن څۂ خاموشہ او بې شورہ موسېقی جوړوم
زما جانانہ نن دې سترګو لہ کجلہ راوړمہ
ددې بڼو نہ بہ ډې ګورې نن ازغی جوړوم
راځئ ملګرو چې دا تلے وخت پہ شاہ راولو
تاسو ګودرې لټوئ زۂ بہ منګی جوړوم
یو مسافر د ائینې نہ دا پښتنہ کوی
زۂ زندګی بربادوم کہ زندګی جوړوم
ھسې خو نوم لہ پہ دې کلی کښې بلھا خلق دے
زۂ بہ دې خلقو نہ کہ خداے غوښتہ سړی جّوړوم
زما مثال ھم زما ګلہ د کابل غوندې شو
پردی مې خپل نۂ کړۂ د خپلو نہ پردی جوړوم
مونږ لېونی خو پہ دې نۂ یُوچې تاوان دے پکښې
اور تہ وردانګو کہ چا اووې چې جانان دے پکښې
لحد بہ ھم دا مئین زړۂ لہ مانہ خاورې نۂ کړی
چې ستا د یاد کلے تر څو پورې ودان دے پکښې
نور ددې ښار د ھیڅ یو شی قیمت تپوس مۂ کوہ
یو د انسان د ژوند قیمت دے چې ارزان دے پکښې
مونږ د نظر اور لګولے ورتہ زړونہ سېزُو
د ښائستونو ښار تہ ګورئ چراغان دے پکښې
لہ قہرہ سرۂ شی غاښونہ او چیچی خو چپ پاتې شی
خوی د کافر دے خو فطرت د مسلمان دے پکښې
پښتون لالے مې سر شېندی خو سرکوزی نۂ منی
د ننګ نہ ډک دے غېرتی ځوان دے ایمان دے پکښې
ګلہ د ھغوی ښکلو سترګو مھربان نظر کښې
ډېرې ښېګړې دی پکښې خو ډېر تاوان دے پکښې